ខេត្តកោះកុង : កោះស្ដេច
កោះស្ដេច គឺជា កោះធម្មជាតិមួយ ឋិតនៅក្នុងភូមិ កោះស្តេច ឃុំកោះស្ដេច ស្រុកគីរីសាគរ ដែលលាតសន្ធឹងតាមបណ្ដោយសមុទ្រមានចម្ងាយប្រមាណជាង ៨១ គីឡូម៉ែត្រ ពីទីរួមខេត្តកោះកុង។ កោះស្ដេច មានចំងាយប្រមាណជា ២៥០ គីឡូម៉ែត្រពីរាជធានីភ្នំពេញ ដោយត្រូវធ្វើដំណើរជាពីរដំណាក់កាល គឺផ្លូវគោក និង ផ្លូវទឹក ដោយជិះអូប័រ (ទូកតូចដែលមានល្បឿនលឿន)។ រមណីយដ្ឋានកោះស្ដេច មានឆ្នេរខ្សាច់សស្អាត មានផ្ទះសំណាក់ និង ទេសភាពស្រស់ស្អាតសម្រាប់លំហែលំហើយ ព្រោះមានកោះជាច្រើននៅជុំវិញ និង ព្រៃធម្មជាតិ។ទន្ទឹមគ្នានេះ ភ្ញៀវទេសចរអាចជួលទូកជិះទៅស្ទូចត្រី មុជទឹកសមុទ្រ មើលផ្កាថ្ម និង ប្រព័ន្ធជីវចម្រុះ នៅបាតសមុទ្រ ព្រមទាំងមានទូកយន្តសម្រាប់ដឹកអ្នកទេសចរជាតិ និង អន្តរជាតិ ពីកោះស្ដេចទៅទស្សនាតំបន់កោះនានា ឋិតនៅប្រជុំកោះក្បែរៗនោះទៀតផង។ មួយវិញទៀត នៅរមណីយដ្ឋាន កោះស្ដេច ភ្ញៀវទេសចរទាំងឡាយ ក៏អាចមើលថ្ងៃរៀបលិចដ៏ស្រស់ស្អាត ដែលជាទីកម្សាន្ត បំបាត់ទុក្ខកង្វល់របស់ប្រិយមិត្ត បន្ទាប់ពីបំពេញការងារយ៉ាងនឿយហត់ពេញមួយសប្ដាហ៍កន្លងមក។ក្រោមការបណ្តាក់ទុនវិនិយោគ និងអភិវឌ្ឍន៍ពីក្រុមហ៊ុនចិន «យូញៀន គ្រុប» ( UNION GROUP ) កោះស្តេចស្ថិតនៅស្រុកគិរីសាគរ ខេត្តកោះកុង នឹងក្លាយជារមណីយដ្ឋានទេសចរណ៍ក្នុងលំហសមុទ្រ ដែលគួរឲ្យទាក់ទាញបំផុត ។ កោះស្តេចត្រូវក្រុមហ៊ុនវិនិយោគ UNION GROUP ដាក់ទុនវិនិយោគជាច្រើនលានដុល្លារ ដើម្បីអភិវឌ្ឍន៍ឲ្យក្លាយជារមណីយដ្ឋានធម្មជាតិដ៏ទំនើប និងមានភាពល្បីល្បាញនៅកម្ពុជា គួបផ្សំទៅនឹងការអភិវឌ្ឍច្រកសេដ្ឋកិច្ចដឹកជញ្ជូនខ្នាតអន្តរជាតិដ៏ធំភ្លាប់ទៅនឹងពិភពលោក។តំបន់កោះសេ្តច គឺជាច្រកល្បីល្បាញឈ្មួញរកស៊ីនាំទំនិញគេចពន្ធពីលំហសមុទ្រចូលកម្ពុជាយ៉ាងសន្ធឹកសន្ធាប់ តែឥឡូវនេះតំបន់កោះស្តេចកំពុងបោះជំហានទៅរកការអភិវឌ្ឍមួយមានតម្លាភាព។ តំបន់កោះស្តេចបច្ចុប្បន្នកំពុងអភិវឌ្ឍន៍ក្នុងសភាពលាក់ខ្លួន ស្ទើរតែមានមនុស្សតិចណាស់បានឃើញការអភិវឌ្ឍនៅទីនោះ ។ ទោះជាយ៉ាងណាក្តី ការអភិវឌ្ឍតំបន់កោះស្តេចបានលេចឮដល់កាសែតនៅអឺរ៉ឺប និងបានផ្សព្វផ្សាយពាសពេញពិភពលោករួចជាស្រេចទៅហើយ ៕
ព្រឹត្តិការណ៍
គុនល្បុក្កតោខ្មែរ
ឧទ្យានបុរាណវិទ្យាអង្គរ
